تعالوا في هذى الرحله نتذكر الماضي ..
1- تذكرون البنات قبل لي حطوا دهن في شعرهم ولا حنه كانوا يلفون راسهم بجيس جمعيه ولا جيس خبز لبناني ولازم شعار المطاحن يكون فوق لوووول.
2- تذكرون لما اييلك واحد مليق من العايله اكبر منك ويقولك تبي اسويلك ساعه وانت تمدله ايدك ويقوم يعضك ذيج العضه اللي تنوطح منها.
3- تذكرون لما كنا نصور فوري عند مصور الجمعية وطبعا غصبن عليك الخلفيه زرقه مو بكيفك ولازم تمشط شعرك بالمشط اللي عنده كله شعر ووصاخه وبعدين يقصلك الصورة بالآله اللي عنده ام ذراع والاطراف مشرشره يعني يكون حركه.
4- تذكرون ايام حصة الموسيقى قبل كان الدرس لمدة سنه عباره عن تـافـاتيـي فـــي تــاتــي والصفقه بصبعين بس..... صج كان منهج صعب.
5- تذكرون لي شفت واحد عنده سيارة مرسيدس كان يحوشك فضول الا تبي تعرف شنو اكو بالصيدليه اللي ورى بالسياره ونقعد انطلطل بالسياره واخر شي يطلع (بلاستر وباندج)
6- تذكرون اول يوم دوام بالمدرسه كانوا يسلمونا الكتب كلهم مع بعض وصافينهم من الكبيييييييييير لي الصغير وطبعا الكبير كتاب العلوم وكانوا يربطونهم بحبل عشان ما ينفلون مع 6 كشاكيل.
7- تذكرون المعجون الصغير اللي ريحته تبط الراس ومعاه عود لونه احمر وكنا نبطله بالمقلوب ونرعصه ونلف العود عليه وننفخ عشان نسوي تفاخيه وطبعا لا تفاخيه ولا قالها الله لين تطلع بلاعيمك منه.
8- تذكرون لما كانوا الاولاد يلعبون كره مبارات بالفريج واذا كان واحد من الفريق ناقص لاعب بعد ما يبيله قولجي دفاع هجوم ماشاء الله قرندايزر مو قولجي وطبعا كان اللعب لــي اذان المغرب اول ما يقول الله اكبر يعني الصفاره.
9- تذكرون لما كنا نشوف افتح يا سمسم وانتأثر بكعكي اللي ياكل بسكوت ونشتري بسكوت كاكاو ونقعد ناكل مثله والوالده تصارخ من قمة راسها قطيــعه شنو هالشفاحه من لاحقكم.
10- تذكرون يوم الجمعة... نقعد من الصبح علشان نسمع أغنية في عالم الشعوب قصائص لا تنتهي وعالم حلو بهي يسكن في قلوب في قصص الشعوب.
11- تذكرون لما كانوا بالصيف يسبحونا من الطشت والمغرافه الزرقه او الحمره لوول وانت تتنافض من البرد وتنطر متى يكتون عليك ماي... اي بطل الدوش وفك عمرك.... يا سلام على سياسة ترشيد المياه منذ القدم.
12- تذكرون اغنيه يا وردتي يا نديه روحي لخلي هديه كانوا اهل الكويت ميتيــــن ويشوفون ويه البنت اللي كانت ترقص لأنها كانت تنزل شعرها على ويهها لي يت صوب الكاميرا.... يا عيني على الستر.
13- تذكرون تيلفون بو قرص اللي يخيب ثناك وانت تتصل ويااااااا ويلك يطلع الرقم مشغول لأن ما في ريدايل والله يعينك لي بغيت تدق مكالمه حق خدامتكم تلاقي اصابيعك يذوب ... صج كانت معاناة بالعيشه.
14- تذكرون لما نرجع من الزواره كنا انتناجر منو اللي ينسدح ورى بالسياره صوب الجام ويطقها نومه لي البيت... لالا ويتحرش بخوانه ينزل ريله عليهم يعني يكون حارهم لوووووول.
15- تذكرون لما كنا نربط الشرشف او الفله على رقبتنا يعني يكون سوبرمان ونصعد فوق الكبت وانط على الدواشق واخر شي طاب غلط ومنكسره ايدك.
16- تذكرون شريط الجراغي الاحمر اللي اذا اخترب المسدس ماله بعد ما يبيله كلام حول على كعب الوالده وكمل عليه بالكاشي ولا على عتبة الباب اخر شي الوالده مكمله عليك بالكعب لووووووول.
17- تذكرون لما كنا نحط قوطي السانكست بالفريزر عشان يثلج مع العصير الطوالي بو نصين وكل ماتروح تبي تاخذه تلاقي الوالده منزلته تحت وما ثلج..... راحت الفرحه.
18- تذكرون لما كان الاولاد يغسلون الحوش بالويك اند قمة الوناسه يمسك المساحه يعني يكون بيساعد واخر شي طايحله علي ويه على الكاشي لوووووول وبالليل رايح الاميري.
19- تذكرون لما كنا نستقبل الحجاج عند الحدود من زود الفرحه واللهفه على الصوغه واخر شي جم مسواج وقحفيتين والكاميرا الحمره وسياده والبنات قطعه خام مالت هنود وساعه مينتها صغيييييييره.
20- تذكرون لما كنا نحب عبدالرحمن العقل ونروح مسرحياته السندباد والزرزورر والف باء تاء ولما الحرامي يكون وراه نصرخ من قمة راسنا ورااااااك وراااااااك واهوا يقول وينه وينه يميييييين يميييييين.... يا عيني على الاستهبال.
21- تذكرون عزايم قبل والصماط المفروش على كبر الحوش اللي على صورة ميوه (فواكه) وريحته لازم ريحة مطبخ وقاعدين على المده اللي لي قمت تلاقي ريلك كلها شخوط من المده.... ياخي شنو هالزهد بس.
22- تذكرون لما هبينا في مجلة المجالس وبصفحة كريمة شاهين اللي يكتبون فيها... انا فتاة ابلغ من العمر 18 سنه واحببت شابا حبا جما ولا استطيع ان افارقه وتقدم لي اكثر من مره ولكن اهلي رفضوا.
23- تذكرون لما هبينا في اغنيه البحريني سليمان الزيمان ولييييييييي في ربوووووووع الشمال غرام حي وزنبقه طاهره وحاطين المسجل على قاري منتزه الخيران وحد الصوت العالي وطيحله فراره بالمنتزه عشان تأسر قلوب العذارى لووووووووول.
24- تذكرون لما يبلشون الشباب يدخنون زقاير كل واحد حاط باكيت بمخباته ولافه بكلينكس عشان ما يبين من الدشداشه الصيفيه ولي شاف واحد من الربع يدخن يسأله السؤال المعهود (ها فلان تكنها ولا ما تكنها) لووول شدعوه شي زين عاد... وكان لازم مالبورو احمر شعار الرجوله.
25- تذكرون ايام الدراسه قبل يعني يكون بنشد حيلنا بالدراسه ونشتري قلم فسفوري اصفر ولا برتقالي عشان نظلل على الشي المهم اخر شي مظللين على كل الكتاب وين الشي المهم مادري لوووول.
26- تذكرون ايام الكشخه قبل كانت عباره عن سيارة هوندا بيضه اكورد باب واحد ولازق على الرقم من ورى شعار نادي الكويت يعني كووول وولد العاصمه والمشط بالدرج اللي على قبضة يد حق الجاكسون وحاط بالمسجل فرقة الدانه ولا عبدالكريم.
27- تذكرون لما تطوروا الشباب بالطلعه عقب سوق الديره والعماره البيضه قاموا يروحون الصالحيه ويدشون محل محل ويتطمشون حجي هذا بجم وهذا بجم لين يطردهم راعي المحل لما يعرف ان المخباة مافيها الا 1.500 حق الرده يا بالتاكسي ولا وانيت.
موضوع: تــــذكرووووووووووون .. ;pP 
الثلاثاء يونيو 22, 2010 7:17 am
